PAK NA BET HAN ALANGALANG!

Usa na liwat nga makalilipay nga kadaugan para ha Alangalang!

Malinampuson nga ginlansad han Lokal nga Panggobyernohan han Alangalang pinaagi kan Mayor Lovely Yu-Castro an Dehydrated Fruits and Vegetables Processing Shared Service Facility ha Barangay Mudboron, usa nga bag-o nga pasilidad nga maghihimo hin masustansya ngan marasa nga veggie chips nga tatawagon nga “Pak na Bet.”

An Pak na Bet in ginhihimo tikang ha magkadurodilain nga lokal nga utan nga ginagamit ha pakbet. Imbes nga makawang la an mga sobra nga utanon, mahihimo ini nga crispy ngan masustansya nga pagkaon nga puydi pa maibaligya ngan makahatag hin dugang nga kita ha aton mga parag-uma ngan iba pa nga Alangalanganon.

Diri la ini basta bag-o nga produkto. Ini in usa nga paagi agod mapahimuslan naton hin maupay an aton lokal nga mga produkto, ngan ha pariho nga panahon, makahatag hin dugang nga panginabuhian ha aton,

Ngan yana, mayda na liwat kita usa nga produkto nga puydi naton ipasigarbo nga tinuod nga aton kun diin nagtikang ha aton tuna ug gin proseso hin may gugma hin Alangalanganon.

Tikang ha malinampuson nga pag-abri han Community College of Alangalang, yana mayda na liwat kita usa nga maipapakita nga bunga han pagtinabangay ngan pagkaurosa.

Kadaugan na liwat. Usa na liwat nga tigaman han nagpapadayon nga pag-uswag han Alangalang.

VICTORY AFTER VICTORY! USWAG PA, ALANGALANG!