Malinampuson nga natapos an CHED Regional Quality Assessment Team (RQAT) Assessment and Evaluation ha Community College of Alangalang (CCA) – usa nga importante nga pitad ha padayon nga pag-uswag han aton bag-o nga kolehiyo.

Gintikangan an assessment pinaagi hin opening program ha CCA Board Room, nga gindumara ha presensya han CCA administration, faculty ngan staff, CCA Governing Board, ngan mga opisyal han LGU ha pangunguna ni Mayor Lovely Yu-Castro,

Nagpapasalamat an LGU Alangalang ha CHED RO VIII RQAT, nga ginpangunahan ni Sir Narciso C. Candiza, kaupod an iya team, tungod han ira propesyonalismo, mga suhestyon, ngan panahon nga ira iginhatag para ha pag-assess ngan pagpauswag han CCA.

Naghatag gihap hin higayon pagbisita hi CHED RO VIII Regional Director Dr. Maximo C. Aljibe, kaupod hi ALCU President Dr. Clemelle L. Montallana, nga nakaghatag hin dugang nga kusog ngan inspirasyon ha CCA community.

Ini nga kalamposan diri la kalamposan han CCA kundi han bug-os nga Alangalang – han LGU, Governing Board, administration, faculty, staff, ngan ngatanan nga waray kapoy nga nagsuporta hini nga damgo.

Usa na liwat nga pitad an nalabyan. Diri pa tapos, pero hirani na kita.

Ha pagkayana, gin huhulat pa an pormal ug opisyal nga pagkarawat han LGU Alangalang han Permit to Operate para han CCA tikang ha CHED Regional Office VIII.

Padayon, CCA! Padayon, Alangalang!